IT كارخانىلىرى ھەمكارلىق يولىغا ھەقىقىي قەدەم باستى

•  2014/11/29
•  4,449
•  ھەھبەھرىلەش

ICTEF (ئۇچۇر ئالاقە تېخنىكىسى مۇتەخەسسىسلەر مۇنبىرى) قۇرۇلدى
IT كارخانىلىرى ھەمكارلىق يولىغا ھەقىقىي قەدەم باستى

(ئەسكەرتىش: خەۋەرنىڭ ئاساسىي قىسمى نۇر تورىدىن ئېلىندى. ئىنچىكە تەپسىلاتلارنى شىركىتىمىز تەييارلىدى)

بۇ يىللاردا مەيلى دۆلىتىمىز ئىچىدە بولسۇن ياكى پۈتكۈل خەلقئارا مىقياسىدا بولسۇن IT (ئۇچۇر تېخنىكىسى) ساھەسىنىڭ تەرەققىيات سۈرئىتى ھەممە ئادەمنى ھاڭ-تاڭ قالدۇردى، ئۇ خۇددى تۇيۇقسىز كەلگەن شىددەتلىك ئېقىندەك يوپۇرۇلۇپ كېلىپ، جەمئىيەتنىڭ ھەممە بۇلۇڭ-پۇچقاقلىرىغىچە تارىلىپ، سىياسەت، ئىقتىساد، مەدەنىيەت، مائارىپ، پاراۋانلىق، كۈندىلىك تۇرمۇش قاتارلىقلارغا غايەت زور تەسىر كۆرسىتىپ، جەمئىيەتنى تۈپتىن ئۆزگەرتىۋەتتى.

ئۇ ھەتتا ھەربىر شەخىسنىڭ كۈندىلىك تۇرمۇش ئادىتى، ئىجتىمائىي ئالاقە ئۇسلۇبلىرىغىچە ئۈسسۈپ كىردى. ئۇ بۇ جەرياندا ئۇچۇر دەۋرى، زامانىۋىيىلىق، تەرەققىيات قالپىقىنى كىيگەن يېڭى بىر خىل ئىقتىساد ئەندىزىسى، ياشاش ئۇسۇلى شەكىللەندۈرۈپ، ئەنئەنىۋى مەۋجۇتلۇق قانۇنىيىتىگە خىرىس ئېلىپ كەلدى. مۇنداقچە ئېيتساق، بۇ قالپاقنى ئوڭشاپ كىيەلىگەنلەر ۋە بۇنىڭغا ماسلىشالىغانلار ھايات قالدى، تەرەققىي قىلدى. بۇ قالپاقنى كىيەلمىگەنلەر ۋە ماسلىشالمىغانلار بولسا تەبئىيلا شاللاندى. شۇنىڭ ئۈچۈن ئۇچۇر تېخنىكىسىنى جەمئىيەت ئىقتىسادىنى ئالغا سىلجىتىشتا تۈۋرۈكلۈك رول ئوينىغۇچى ئەڭ مۇھىم ئامىل دەپ قاراشقا تامامەن بولىدۇ.

جاھان تەرەققىيات ئەھۋالىدىن ھەممە ھەر ۋاقىت خەۋەردار بولۇپ تۇرىدىغان بۇ دەۋر بىزگە ئۆزىمىزنى ياخشى تونۇتتى، بىزنى كۆپ ئويلاندۇردى، ئېنىق سېلىشتۇرما ئارقىلىق پەرقنى بىلدۈردى. شۇنىڭ بىلەن يېڭى بىر مەيدان جەمئىيەتنى ۋە ئىقتىسادنى تەرەققىي قىلدۇرۇش دولقۇنى شەكىللەندى، ھەرخىل ساھەلەردە كارخانا-شىركەتلەر قۇرۇلدى.

يۇقىرىدا ئېيتقاندەك، يېڭى دەۋىردىكى يېڭى چولپان — ئۇچۇر تېخنىكا ساھەسىمۇ ئۇيغۇرچىلىقتىن ئورۇن ئېلىپ، دىيارىمىزدا بۇ ساھەدە يېڭى گۈللىنىش دولقۇنى قوزغالدى. ئۇچۇر تېخنىكىسى ئىقتىساد تەرەققىياتىدىكى مۇھىم ئامىل بولۇش سۈپىتى بىلەن كۆزنى قاماشتۇرغۇدەك تەرەققىيات ئىستىقبالى، كەسكىن رەھىمسىز بازار رىقابىتى ۋە پۈتمەس-تۈگىمەس يېڭىلىق يارىتىش پۇرسەتلىرىنى ياراتتى.

ئۇنىڭغا ياخشى ماسلىشىش، جەمئىيەت ئىقتىسادىنىڭ تەرەققىياتىغا ھەقىقىي تۈردە ئەمەلىي تۆھپە قوشۇش ئۈچۈن ئۆزئارا ھەمكارلىشىش، ئۆزئارا ئۆگىنىش، پىكىر ئالماشتۇرۇش ۋە توختىماي ئۆزىنى كۈچەيتىپ تۇرۇش لازىم. نىيەت بىر، نىشان ئوخشاش ئەھۋالدا ھەمكارلىق ئەڭ گۈزەل نەتىجىنى ئېلىپ كېلىدۇ، ئەلۋەتتە.

شىنجاڭ ئالماس يۇمشاق دېتال شىركىتىنىڭ تەشەببۇس قىلىشى ۋە دىيارىمىزدىكى باشقا سەككىز شىركەتنىڭ قىزغىن ئاۋاز قوشۇشى نەتىجىسىدە، 2014-يىلى 10-ئاينىڭ 31-كۈنى دىيارىمىزدا «ئۇچۇر ئالاقە تېخنىكىسى مۇتەخەسسىسلەر مۇنبىرى» قۇرۇلدى. بۇ مۇنبەر 2014-يىلى 11-ئاينىڭ 17-كۈنى شىنجاڭ ئۇيغۇر ئاپتونوم رايونلۇق يۇمشاق دېتال ئىلمىي جەمئىيىتى تەرىپىدىن تەستىقلاندى.

بۇ مۇنبەر بىلىم تارقىتىش، ھەمكارلىق، باراۋەرلىك ۋە ئېچىۋېتىش پىرىنسىپى ئاساسىدا پەسىللىك يىغىلىش ئۆتكۈزۈش، تېخنىكا ئالماشتۇرۇش، مەخسۇس سۆھبەت، لېكسىيە قاتارلىق مەزمۇنلارنى ئورۇنلاشتۇرۇش ئارقىلىق IT ساھەسىدىكى مىللىي كارخانىلارنىڭ ئورتاق تەرەققىي قىلىشىنى مەقسەت قىلغان.

مۇنبەرگە دەسلەپكى قەدەمدە دىيارىمىزدىكى توققۇز كارخانا ئەزا بولغان بولۇپ، بۇلار تۆۋەندىكىلەردىن ئىبارەت:

(ئەسكەرتىش: شىركەت ماركىسى باش ھەرپىنىڭ ئېلىپبە تەرتىپى بويىچە تىزىلدى)

شىنجاڭ ئالماس يۇمشاق دېتال چەكلىك شىركىتى

ئۈرۈمچى ئەلا يۇمتال چەكلىك شىركىتى

ئۈرۈمچى بىلىگ تور پەن-تېخنىكا چەكلىك شىركىتى

شىنجاڭ قارلۇق مېدىيا پەن-تېخنىكا چەكلىك شىركىتى

ئۈرۈمچى كومپيۇتېر ھەۋەسكارلىرى ئېلېكتىرون پەن-تېخنىكا چەكلىك شىركىتى

ئۈرۈمچى ئۆتكۈر بىز يۇمشاق دېتال تېخنىكا چەكلىك شىركىتى

ئۈرۈمچى ئۇيغۇرسوفت يۇمشاق دېتال چەكلىك شىركىتى

شىنجاڭ يىپەك يولى بۇلۇت تور پەن-تېخنىكا چەكلىك شىركىتى

ئۈرۈمچى يەلتاپان ئېلېكتىرون پەن-تېخنىكا چەكلىك شىركىتى

بۇ توققۇز كارخانا مۇنبەرنىڭ دەسلەپكى ئىجرائىيە ھەيئەت ئەزالىرى بولۇپ، بۇ قوشۇن داۋاملىق كېڭەيتىلىدۇ. دىيارىمىزدىكى مۇشۇ ساھەدىكى شىركەتلەر مۇنبەرگە تىزىملىتىپ، ئەزا بولسا بولىدۇ.

ئەزا تىزىملاش ئېلخېتى: tayir@almas.biz

مەزكۇر مۇنبەر ئۇيغۇر IT كارخانىلىرىنىڭ ھەقىقىي تۈردە ھەمكارلىق يولىغا قەدەم باسقانلىقىدىن دېرەك بېرىدۇ. بۇ قەدەملەردىن يېڭى بىر گۈللىنىش پەيدا بولغۇسى.

ھەمكارلىق ھەققىدىكى بۇ خەۋەرنى ئۈرۈمچى كومپيۇتېر ھەۋەسكارلىرى ئېلېكتىرون پەن-تېخنىكا چەكلىك شىركىتىنىڭ مەسئۇلى ئەمەتجان رۇسۇلنىڭ 2014-يىلى 5-ئاينىڭ 3-كۈنى سۆزلىگەن «IT كەسپى ۋە ھەمكارلىق» لېكسىيەسىدىكى تۆۋەندىكى بايانلار بىلەن ئاخىرلاشتۇرىمىز.

«بىز IT كارخانىلىرى ھامان ھەمكارلىشالايدىغانلىقىمىزغا ئىشەنگەن ئىدۇق. دەرۋەقە، مانا ھەمكارلاشتۇق. بىز پەقەت ھەمكارلىققىلا ئەمەس، ھەقىقىي ھەمكارلىقنىڭ نەتىجە بېرىدىغانلىقىغا، ئۆزىمىزنىڭ قولىدىن چىققان مەشغۇلات سىستېمىسى، تاختا كومپيۇتېر، يان تېلېفون قاتارلىق مەھسۇلاتلارنىڭ ھامان ۋۇجۇدقا كېلىدىغانلىقىغا، شۇ مەھسۇلاتلارنى ھەممىمىزنىڭ تاراقشىتىپ تۇرۇپ ئىشلىتىدىغانلىقىمىزغىمۇ ئىشىنىمىز. بىز بۇ مەھسۇلاتلارنى بارلىققا كەلتۈرۈش يولىدا ئاداققىچە، تاكى قارا تۇپراققا كىرىپ كەتكۈچە ماڭىمىز.»